రాష్ట్రంలో సార్వత్రిక ఎన్నికల తర్వాత అనేక దారుణాలు చోటుచేసుకున్నాయి. ఒకవైపు ఎన్నికల పోలింగ్ జరుగుతుండగానే అనేకచోట్ల హింసాత్మక ఘటనలు తలెత్తాయి. ముఖ్యంగా కూటమి పార్టీలకు చెందిన నాయకులు, కార్యకర్తలు అధికార వైసీపీకి చెందిన నాయకులు, కార్యకర్తల ఇళ్లపై దాడులకు తెగబడ్డారు. అనేకమంది తీవ్రంగా గాయపడ్డారు. ఎంతోమంది మృత్యువాత కూడా చెందారు. ఇటువంటి దారుణాలకు సంబంధించిన ఒక వీడియో తాజాగా వెలుగులోకి వచ్చింది. సార్వత్రిక ఎన్నికలు జరిగిన మరుసటి రోజు జరిగిన ఘటనకు సంబంధించిన ఈ వీడియోలో షాకింగ్ కలిగించే విషయాలు ఉన్నాయి.
తాడిపత్రిలోని అప్పటి ఎమ్మెల్యే పెద్దారెడ్డి ఇంటికి పెద్ద ఎత్తున పోలీసులు వచ్చారు. ఇంటి మొత్తాన్ని తనిఖీ చేస్తున్నారు. సాధారణంగా పోలీసులు కాబట్టి తనిఖీ ప్రక్రియను పద్ధతి ప్రకారం చేస్తారు. కానీ పెద్దారెడ్డి ఇంటికి వచ్చిన పోలీసులు అత్యంత దారుణంగా వ్యవహరించారు. ఇంటిలో ఉన్న సీసీ కెమెరాలు పోలీసులే తమ లాఠీలతో పగలుగొట్టే ప్రయత్నం చేశారు. సీసీ కెమెరాలను పోలీసులు పగలకొడుతున్న దృశ్యాలు రికార్డ్ అయ్యాయి. పెద్దారెడ్డి ఇంటికి పోలీసులు ఎందుకు వచ్చారు. సీసీ కెమెరాలను ఎందుకు పగలగొట్టారు అన్న విషయం తెలియాల్సి ఉంది. ఆలస్యంగా వెలుగులోకి వచ్చిన ఈ వీడియో ప్రస్తుతం సామాజిక మాధ్యమాల్లో తెగ వైరల్ అవుతుంది.
అప్పటికి ఇంకా ఫలితాలు రాకముందే పోలీసులు ఏ స్థాయిలో కూటమి పార్టీల నాయకులకు వత్తాసు పలికారు తెలియజేసే వీడియోగా దీనిని పలువురు నెటిజన్లు పేర్కొంటున్నారు. ఎన్నికల రోజు నుంచే రాష్ట్రంలో కూటమి నాయకుల దారుణాలు పెరిగిపోవడంతోపాటు పోలీసుల వ్యవహార శైలి దారుణంగా మారిపోయిందంటూ పలువురు వ్యాఖ్యానిస్తున్నారు. ప్రతిపక్ష పార్టీలకు చెందిన కార్యకర్తలు మాదిరిగా పోలీసులు వ్యవహరించిన తీరు జుగుప్సాకరంగా ఉందంటూ పలువురు పేర్కొంటున్నారు. ప్రస్తుతం ఈ వీడియో సోషల్ మీడియాలో తెగ వైరల్ అవుతుంది. ఈ వీడియోని చూసిన ఎంతోమంది వీళ్ళు పోలీసులేనా అంటూ ప్రశ్నిస్తున్నారు.
