ఏపీ రాష్ట్ర హోంమంత్రి అనితను రాష్ట్రంలో శాంతిభద్రతలపై ప్రశ్నిస్తే చేతులెత్తేశారు. ఎవరో ఎక్కడో చంపుకుంటే నన్నేం చేయమంటారు.. ‘నేనేమన్నా లాఠీ పట్టుకొని రాష్ట్రమంతా తిరగాలా?’ అంటూ ఎదురు ప్రశ్నించారు.
రాష్ట్రంలో నెలకొన్న అశాంతి, ప్రజల్లో పేరుకుపోయిన అభద్రతాభావ పరిస్థితులపై హోంమంత్రి వంగలపూడి అనిత సంచలన వ్యాఖ్యలు చేశారు. లా అండ్‌ ఆర్డర్‌పై ప్రశ్నించిన మీడియాపై ఆమె అసహనం ప్రదర్శించారు.
‘మీరు హోంమంత్రిగా ఏం చేయలేకపోయారు కదా?’ అని ఓ రిపోర్టర్‌ అడిగిన ప్రశ్నకు ఆమె బదులిస్తూ.. ‘‘నన్నేం చేయమంటారు?. నేనే లాఠీ పట్టాలా..? గన్ పట్టాలా?. దేనికైనా టైం రావాలి. ఒకేసారి ఏం చేయలేం కదా. దేనికైనా టైం పడుతుంది’’ అని అన్నారామె.
ఇక.. నెలకు పైగా సాగిన కూటమి పాలనలో రాష్ట్రంలో శాంతిభద్రతలు ఘోరంగా దెబ్బతిన్నాయి. ఓ వైపు వైఎస్సార్‌సీపీ నేతలపై కక్షసాధింపు దాడులు కొనసాగుతున్నాయి. మరోవైపు.. హత్యలు, వేధింపుల పర్వాలు, చిన్నారులతో సహా మహిళలపై అఘాయిత్యాలు కొనసాగుతున్నాయని రిపోర్టర్లు ప్రశ్నల వర్షం కురిపించారు.
అయితే హోంమంత్రి మాత్రం తాపీగా నేనేమన్నా వెళ్లి కంట్రోల్ చేయాలా? అంటూ దబాయించడం విశేషం. శాంతి భద్రతలపై సమీక్షించి చర్యలు తీసుకోవాల్సిన హోంమంత్రి ఇలా మాట్లాడడంపై విమర్శలు వ్యక్తమవుతున్నాయి.
